په کابل کې د ایرنا خبري آژانس د راپور له مخې، د افغانستان د سرپرست حکومت د ویاند مرستیال حمدالله فطرت د دوشنبې په ورځ (د مرغومی ۳ مه) وویل: د پاکستان دفاع وزیر خواجه آصف له یوه پاکستاني چینل سره په خبرو کې ويلي چې سلطان محمود غزنوي (رحمه الله علیه) هندوستان ته د لوټ تالان لپاره تګ او راتګ کاوه او ګواکي خواجه آصف سلطان محمود غزنوي کوم قهرمان نه مني.
هغه زیاته کړه: د افغانستان اسلامي امارت د خواجه آصف دغه بې مسئولیته خبرې په کلکه ردوي او دا له تاریخي واقعیتونو څخه د خواجه آصف ناخبري بولي.
فطرت وویل: تاریخ شاهد دی چې سلطان محمود غزنوي رحمة الله علیه هرځل د مظلومو ولسونو خصوصا د مسلمانانو د نجات او آزادۍ لپاره هند او نورو سیمو ته تللی و او غزنوي رحمة الله علیه د ټول مسلمة امت لپاره یو افتخار دی.
ده زياته کړه له بده مرغه چې د پاکستان د دفاع د وزیر په کچه یو سړی له حقایقو دومره ناخبره دی.
د فطرت په وینا، یو پاکستانی مسئول په داسې حال کې د سلطان محمود غزنوي په اړه ګستاخانه څرګندونې کوي چې د همدې هېواد په دفاعي میزائیلو باندې د محمود غزنوي نوم ايښودل شوی.
فطرت تأکید وکړ اګرکه سلطان محمود غزنوي په اصل کې یو مسلمان افغان وو خو د سیمې د ټولو مظلومو او تر ګواښ لاندې ولسونو سره یې د خپل ایماني مسؤليت له مخې همکاري او همدردي درلوده او د هغوی د سر او مال څخه دفاع یې خپل فرض ګڼل، هغه څه چې نن سبا یې خواجه آصف او ورته نور خلک هيڅ تصور هم نشي کولای.
د ایرنا په وینا، سلطان محمود د غزنویانو د کورنۍ لومړنی واکمن او ستر شخصیت و، هغه د خپل جنګیالی او جرعت او د اسلام په تاریخ کې د فتوحاتو د زیاتوالي او د دربار د عظمت له امله مشهور دی، په ځانګړې توګه په هند کې د ده فتوحات او غنیمتونه راوړل.
د پیغام پای/
Your Comment